Sesións Gonzalo: Didáctica da ensinanza das linguas estranxeiras. Diario

Para comezar esta derradeira entrada do apartado Diario para o docente Gonzalo na materia de Didáctica, gustaríame dicir que estas dúas sesións parecéronme moi interesantes porque se trataron temáticas que xa eran coñecidas pola maioría da clase, mais resolvéronse dúbidas e aclaráronse conceptos que non sempre estan do todo claros. Un exemplo disto foi a terminoloxía que tratamos en relación cos diferentes tipos de linguas e coas comunidades lingüísticas e de lingua. 

Un aspecto que me pareceu moi interesante de ambas sesións foron os diferentes tipos de actividades que se utilizaron: o placemat activity e o diagrama de Venn. Creo que estas dúas maneiras de traballar foron moi adecuadas para o contexto no que nos atopábamos, pero tamén nos pode axudar a realizar actividades similares na nosa propia práctica docente. Isto creo que se debe principalmente á creación dos continuos debates derivados destas metodoloxías de traballo, que dependendo do nivel e do tipo de alumnado que teñamos sempre o imos poder adaptar á temática e ao contexto.

 Outro aspecto que me pareceu de grande importancia foi as distintas variables que afectan ao ensino, en concreto o ensino de linguas estranxeiras. Creo que a variable que todo docente debería ter en conta sen dúbida é a das características do alumnado. Por que lle dou tanta importancia? Pois porque como sempre se nos lembra, tanto a nivel académico como, agora na LOMCE, a nivel lexislativo sempre temos que ter presente a máis que coñecida atención á diversidade. Como teño opinado en numerosas ocasións, incluso en entradas deste blogue, este concepto é demasiado abstracto se temos en conta o que nos establece a LOMCE, xa que o concepto explícase, mais as metodoloxías a utilizar non están para nada claras. No noso caso, o ensino de linguas estranxeiras dificulta un punto máis o noso traballo, posto que estamos a comunicarnos nunha lingua que pode ser totalmente descoñecida para parte do alumnado. 

Finalmente tamén me gustaría falar sobre a motivación, un tema que tratamos brevemente debido á falta de tempo na segunda e última sesión do docente Gonzalo. Creo que a motivación é un dos piares que soportan a educación, tanto para o alumnado como para o profesorado. Por un lado o alumnado necesita motivación tanto intrínseca como extrínseca, mais na miña opinión precísase inicialmente a segunda para poder obter a primeira. Se o alumnado chega a unha aula onde non atopa un motivo polo que interesarse e aprender esa materia, a motivación é inexistente. Por outro lado, o profesorado tamén precisa de motivación, neste caso máis ben intrínseca, algo que se atopa en completa relación coa vocación que lles levou a dedicarse a esta profesión.