Terceira Entrada Luz Valencia (06/02/18)

Nesta terceira sesión coa docente Luz Valencia centrámonos na produción escrita ou máis coñecida como writing. Para introducir esta competencia, debatemos sobre se en realidade existen tan só 4 skills (writing, reading, listening e speaking). Creo que non só se trata de traballar as 4 competencias básicas dunha lingua estranxeira, senón que vai máis alá. Por exemplo dentro da habilidade ou competencia de speaking debemos ter en conta a interacción e mediación que esta habilidade conleva e require. Non só se trata de falar na lingua estranxeira, senón que o alumnado ten que ser capaz de comunicarse adecuadamente, e aquí non só entra a comunicación oral, tamén inflúe en como comunicamos co noso corpo. Polo tanto, sempre debemos de ter en conta que cando estamos traballando algunha desas 4 skills, estamos a traballar moitos aspectos que inflúen nestas, así á hora de realizar unha actividade ou tarefa todas estas variantes deben estar presentes en maior ou menor medida.

Por outro lado, centrándonos na produción escrita, pareceume moi interesante como a docente insistiu nas razóns que nos levan a facer unha actividade ou tarefa. Isto semella obvio, mais moitas veces esquécese a razón ou o obxectivo polo que se leva a cabo as actividades. Polo tanto deberíamos tentar cambiar os writings aos que todas e todos estamos máis que acostumados. Así podemos facer writings sobre temas sobre os que o alumnado se interese (redes sociais, artigos de revistas ou periódicos), non esquezamos nunca que eles e elas son o centro do noso traballo, traballamos para o alumnado, non para uns contidos. Unha forma de estar preto do alumnado, ter en conta os contidos, pero tamén facer un uso útil da nosa práctica docente, é achegarnos cada vez máis á realidade inmediata que vive o noso alumnado, así podemos facer actividades de writing sobre o bo ou mal uso das redes sociais, programas de televisión coñecidos ou incluso como nos ensina a compañeira Sara González utilizar persoas influentes ou coñecidas a nivel estatal. 

Traballo de casa: Actividade de produción escrita.

Como establecín ao longo de todas as miñas publicacións o alumnado é o centro de todo o noso traballo como docentes, polo tanto gustaríame levar a cabo unha actividade tendo en conta os seus intereses e inquietudes, sempre orientándoos e aportándolles unha serie de instrucións.

O noso obxectivo mediante a nosa actividade é que o alumnado sexa quen de expresarse, que se sinta motivado á hora de realizar un writing, deixando dun lado os escritos académicos aos que están acostumados. Para o alumnado dun nivel intermedio/baixo comezaremos co utilización do seguinte vídeo:

O vídeo está composto  por frases que seguen sempre a mesma estrutura e, aínda que non sexan capaces de recoñecer o vocabulario ao completo, poden seguir a estrutura  en todo o vídeo. Tras ver o videoclip pediremos ao alumnado que escriba frases coa mesma estrutura sobre "dumb ways to die" que se lle podan ocorrer. Unha vez feito, pasaremos a ver parte do seguinte vídeo:

Mediante este vídeo sen letra nin audio pediremos ao noso alumnado que recoñeza todos os obxectos que aparezan no vídeo, tentaremos seleccionar eses obxectos que coñezan e teñan máis a man. A raíz deste vídeo pediremos unha historia que relate a vida dun obxecto cotián e unha "dumb way to die" en relación con ese obxecto. Un exemplo podería ser a vida dun ovo dende que nace ata que acaba fritido na tixola. Creo que se trata dun writing distinto ao que o alumnado non está acostumado e pode motivalo.

Por outro lado se o noso alumnado ten un coñecemento do idioma estranxeiro, este caso o inglés, intermedio/alto podemos seguir co mesmo writing mais comezaremos cun vídeo quizais un pouco máis complexo pero que segue a mesma liña: