Sesión Introdutoria

Nesta primeira sesión o docente procedeu a facer unha introdución sobre os obxectivos e contidos xerais da materia de As linguas estranxeiras no contexto nacional e internacional. Algúns dos elementos dos que versaremos ao longo das sesión con este docente atópanse: políticas lingüísticas da Unión Europea, a política lingüística do estado español e da comunidade autónoma de Galicia, os sistemas de acreditación lingüística oficiais como o Marco Común Europeo de Referencia de Linguas ou a atención á diversidade lingüística. Ademais, as catro facetas a desenvolver durante este curso serán: informativa, reflexiva, innovadora e orientadora. Poderíase dicir que o obxectivo final da materia é capacitar ao alumnado para adquirir as capacidades e habilidades para aplicar os coñecementos aprendidos nesta materia á práctica docente.

Nesta sesión introdutoria comentamos os distintos factores contextuais que inflúen no proceso de ensinanza-aprendizaxe de linguas estranxeiras, entres estes destacan: o contexto xeográfico, histórico e político; o contexto físico e tecnolóxico; o contexto temporal; contexto económico, social e racial; contexto sanitario; contexto xenérico; e contexto educativo específico. Na miña opinión hai diversos factores que creo que estaban desatendidos na miña aprendizaxe de linguas estranxeiras. Nun primeiro momento, destaca o contexto xeográfico e político, posto que non se pode pretender que nunha comunidade histórica como Galicia se tente buscar unha educación plurilingüe cando a lingua propia é minoritaria e continua a ser minorizada mediante unhas políticas que pouco a defenden. Outro factor que destaca para min sería o factor social, posto que a aprendizaxe de linguas estranxeiras no sistema educativo español nunca obtivo un total éxito neste ámbito. E finalmente o factor que máis destaca para min é o do contexto físico.

Creo que todos os factores antes mencionados influíron negativamente na miña aprendizaxe, uns máis que outros. O factor más negativamente influinte foi o do contexto físico, pero non por motivo da organización da clase, senón polos docentes e a súa práctica. Nunca pretendo menosprezar o seu traballo, mais creo que a súa práctica docente non foi a correcta. O motivo principal é levar a cabo unha clase maxistral sen actualización e aproveitando pouco a coñecida dixitalización da aula que tanto promove a Lei orgánica 8/2013, de 9 de decembro, para a mellora da calidade educativa. Por outro lado creo que a pretensión da Xunta de Galicia por buscar unha educación plurilingüe afectou negativamente na calidade do ensino, posto que como establecín antes é complicado impartir materias que non son específicas de lingua estranxeira formando tan escasamente a ese profesorado, que en ocasións non está familiarizado coas técnicas apropiadas.

Segundo a miña opinión creo que se podería resolver parte dos problemas derivados dos factores antes mencionados. Atendendo ao contexto físico, creo que se debería formar de forma continua ao profesorado, tendo en conta a antes mencionada dixitalización das aulas, xa que penso que se trata dun factor de importancia e altamente motivador para o alumnado. Así, poderíamos deixar de un lado o tradicional libro de texto para a práctica mediante exercicios de repetición, e decantarnos por unha dinámica de aula distinta, motivando ao alumnado e tendo en conta os seus intereses. En canto ao contexto político, creo que como docente non podería aportar ningún tipo de solución porque é unha competencia que corresponde ao goberno autónomo. Sen embargo si que me gustaría dicir que as políticas lingüísticas galegas creo que deberían primeiro establecer unhas bases de defensa da lingua propia, para posteriormente optar por unha educación plurilingüe acorde cos obxectivos europeos.

En conclusión, creo que falta moito por camiñar cara unha educación e sociedade plurilingüe tendo en conta as mala estatísticas do estado español no informe PISA. Creo que todo se resume nun problema de base, xa que os continuos cambios de lexislacións afectan de grande maneira á educación e ao sistema educativo.