Primeira Sesión Ana Fontenla
O
martes, 16 de xaneiro do 2018, tivemos a nosa primeira sesión coa docente Ana
Fontenla, profesora no IES Carlos Casares. Primeiramente, gustaríame dicir que
me parece moi interesante e totalmente esencial ter contacto real coa
secundaria neste mestrado, posto que o noso obxectivo principal é impartir
clases nun futuro na ESO e bacharelato. Polo tanto, esta primeira toma de
contacto real cunha profesora que imparte clase en secundaria e
bacharelato, pareceume moi importante á vez que práctica. Deixamos de lado a
parte tan teórica deste mestrado, para meternos de cheo no que nos imos enfrontar
xa non só no noso futuro como docentes, senón nas propias prácticas que debemos
realizar a partir do mes de febreiro nun instituto. Ademais, este aspecto creo
que foi moi ben acollido por todas as miñas compañeiras, xa que precisabamos
deixar dun lado a teorización para achegarnos un pouco máis á práctica docente
real.
Como
comezo, pareceume clave a insistencia que se fixo ao inicio da clase de dous puntos
tan esenciais e dispares como son: a
primeira aula de linguas estranxeiras e a atención á diversidade. Por un lado, a importancia que adquire a
primeira aula moitas veces e escasa ou incluso inexistente, sen embargo como xa
se estableceu nesta primeira sesión creo que é de grande relevancia facer unha
primeira toma de contacto con todo alumnado, non só para coñecelo e para que se
coñezan, senón para poder adaptar a nosa práctica á dinámica que se estableza
na aula dende un primeiro momento. Obviamente, o coñecemento do alumnado e das
súas similitudes e diferenzas é básico para crear unha dinámica boa, motivadora
e funcional; mais o achegamento do profesorado cara o alumnado, establecendo
unha relación máis próxima, sen crear unha pirámide de poder é básica para
recoller unha resposta adecuada. Está claro que sempre se deben establecer unha
serie de límites e normas tendo en conta que estamos ante un alumnado
adolescente, moitas veces en fases conflitivas ou simplemente de cambios
físicos e de personalidade. Ademais, esta primeira sesión é onde se pode activar
esa motivación intrínseca do alumnado, onde se lle amosa a materia de linguas
estranxeiras como algo que deben e queren
aprender. Unha estratexia que ben se podería levar a cabo nesta primeira toma
de contacto son as coñecidas como actividades
de aprendizaxe, xa que como se establece no Diccionario de Términos Clave de Ele: “es típico realizar una
actividad de rompehielos cuando empieza el curso, para que los alumnos de una
clase empiecen a conocerse entre sí”. Este sería un claro exemplo da aplicación
de actividades de aprendizaxe para comezar unha primeira aula.
Por
outro lado, a atención á diversidade creo que supón un punto de inflexión entre
unha boa e unha mala práctica docente. É moi sinxelo chegar á clase, pronunciar
o discurso tradicional cos contidos da materia e rematala con exercicios de
repetición, mais, na miña opinión, non podemos levar a cabo unha teoría tan
arcaica cando a diversidade de alumnado é tan grande na actualidade. Nas
últimas lexislacións como a coñecida LOMCE, está moi presente este termo de
atención á diversidade, mais as estratexias a aplicar son moi escasas. Polo
tanto, como docentes debemos argallar as nosas propias estratexias para ter en
conta as diferenzas e a diversidade que temos en aulas cada vez máis saturadas.
Como non existen dúas persoas total e perfectamente iguais, tampouco existe un
alumnado que aprenda, socialice ou se desenvolva do mesmo xeito. Así, a nosa
práctica docente sempre debe ter en conta este aspecto tan importante, porque o
noso obxectivo final é conseguir que o alumnado adquira uns coñecementos que se
nos establecen dende un currículo, pero tamén axudar a que se convertan en
persoas cun pensamento crítico, autónomas e responsables.
Outro
punto que me pareceu moi interesante foron as diversas actividades que se nos
amosou en clase. Moitas veces insístesenos na importancia de motivar ao
alumnado mediante actividades totalmente innovadores a través da utilización
das TICs, posto que temos infinidade de recursos online. Mais, como xa temos
debatido anteriormente na aula, non ten que ser esencialmente un traballo
mediante as novas tecnoloxías, posto que moitas veces podemos chegar a saturar
ao alumnado. Obviamente podemos utilizar recursos como o storytelling de Jamie Keddie, mais como establece a propia docente
non debemos utilizar recursos audiovisuais demasiado longos ou tediosos que
poden levar ao alumnado ao aburrimento. Existen infinidade de maneiras de atraer
a atención do alumnado, e estas non teñen que ser exclusivamente tecnolóxicas, a innovación non pode nin
debe depender exclusivamente do que coñecemos como Educación 2.0.
Finalmente,
tamén me gustaría tratar unha cuestión que se mencionou nesta sesión, a da vocación
do profesorado. Creo que na actualidade, debido á situación que está a sufrir a
educación, é imprescindible que os novos e novas docentes teña total vocación
por esta profesión, para actualizar e mellorar todo o sistema hai que comezar
dende as bases, e que mellor forma que comezando co profesorado. Xa non se
basea en ter ganas de traballar, senón ganas de educar e ensinar ao alumnado,
de darlle a importancia que realmente ten dentro do noso sistema. Aínda que o
noso obxectivo máis básico sexa ensinar unha serie de contidos, non debemos
esquecer que son persoas en proceso de formación e conformación, e que como se
soe dicir “son a sociedade do futuro”.
Alégrome de que a sesión te parecera de utilidade polo práctica e real que foi.Ese era sen dúbida o meu obxectivo. Concordo contigo na importancia que lle das ó tema da vocación.
ResponderEliminar